Allamah Iqbaal (Baale jibreel) pareshaan hoke meri khaak aakhir dil na ban jaaye...
Description-
pareshāñ ho ke merī ḳhaak āḳhir dil na ban jaaye..
jo mushkil ab hai yā rab phir vahī mushkil na ban jaaye...
Tashreeh-
Allamah kehte hain, ki mere marne ke baad meri raakh muntashir (bikharna) hone ke baad kahin fir ikatthe hokr dil na ban jaye, yaani fir usme jaan na aa jaye aur wo zindah na ho jaaye, kahin fir se mere liye ek mushkil na ban jaye,
Dil zindah hone se pareshaani ka sabab yon hai ki tamaam-tar tamannao'n, ummidon aur khwahishon ka markaz dil hi hota hai, saari pareshaaniyon aur Na-ummidiyon ka bhi sabab dil hota hai...
Wo dil ki tamannayen hi hain, jo insaan ko ek manzil to kbhi dusri manzil ke piche bhatkaati rhtin hain, kisi cheez se mhbbt wa chahat ka sabab bhi dil hai, isliye kahin aisaa na ho ki meri khaak ikaththi hokar dil na bane, aur abhi main jis mushkil se guzar raha hun, fir wahi mushkil na ban jaye...
kar deñ mujh ko majbūr-e-navā firdaus meñ hūreñ
merā soz-e-darūñ phir garmi-e-mahfil na ban jaaye...
Tashreeh-
Allamah keh rhe hain ki agar main jannat pahunch Gaya aur jannat ki hooron ne agar mujhe apne ishqq me sargosh karne ki koshish krna chaahi, aur kahin wo mujhe izhaar-e-ishq ki kaifiyat ke liye majboor na kar den,
Jiski wajah se yahaan bhi meri zindagi me fitoor barpaa rha, is tarah wo jannat me bhi mahfil ki ronaq bane rhenge, aur apni kavishon me lge rhenge, unhe sukoon o rahat kahin bhi mayassar na hogi...
kabhī chhodī huī manzil bhī yaad aatī hai raahī ko
khatak sī hai jo siine meñ ġham-e-manzil na ban jaaye...
Tashreeh-
Allamah kehte hain ki kbhi insaan ko apni guzri hui manzil bhi yaad aati hai, jab bachpan me rhta hai to jawaani ko manzil smjhta, aur fir bachpana yaad aata hai, fir kbhi izzat o shohrat ke piche bhagta hai, fir use apna sukoon aur itmenaan yaad aata hai,
Aisaa unke saath hota hai jo log apne maqsad-e-hayaat ko bhoole hue hote hain, aur Apne waqt ko fizool kaamo me sarf kar dete hain, aur fir jab palat kr apni umr-e-raftah/ guzri hui zindagi ko dekhte hain to unke dil me ek khatak si paidaa hoti hai, unhe apni chordi hui manzil aati aati hai, aur ye jo seene me khatak hai ye gham-e-manzil na ban jaaye, yani khoyi hui manzil ka pachtawa na reh jaye...
( Lehaza apni zindagi aise guzaaren ki jab bhi guzre hue waqt ko palatkar dekhen, to koi khatak koi pachtawa baqi na rahe )
banāyā ishq ne dariyā-e-nā-paidā-karāñ mujh ko
ye merī ḳhud-nigah-dārī merā sāhil na ban jaaye...
Tashreeh-
Allamah kehte hain ki ishq ne mujhe dariya-e-na-paida-karan (aisaa dariya jiska koi kinara na ho) bana diya,
jab Ishq-e-Haqiqi yani Apne deen ke zariye, Apne nabi (S.A.W.) ki muhabbat ke zariye apni rooh ko be-daar kar leta hai, ruhaani manzil hasil kar leta hai to wo goyaa dariya-e-na-paida-karan ban jata hai, yani ek wasee'a samundar, uske andar wo wus'at paida ho jati hai ki usme ye saara zamin o Aasmaan bhi nhin samaa skta hai,
Khud-nigah-dari se muraad hai khud ke upase nazar rhna, aur yahi mera sahil na ban jaye, Sahil se muraad hai ek jagah muqaiyad ho jana, agar insaan khud se aur apne jism ke aage kuch dekh hi nhin sakta, to fir wo khud-nigah-dari me hi reh jata hai aur sahil ban jata hai, kabhi manzil tk pahunch hi nhin pata...
kahīñ is Aalam-e-be-rañg-o-bū meñ bhī talab merī
Wahī afsāna-e-dumbāla-e-mahmil na ban jaaye..
Tashreeh-
Aalam-e-be-rang-o-bu ka mtlb Rang aur khushbu ke bina ye duniyaa, Afsana-e-dumbala-e-mahmil ka mtlb lagataar uunth ki Paalki chalna,
Yahaan Iqbaal ne us waqeyah ke traf ishara kiya hai, jab majnu ne Laila ko khat likhkr bheja tha, aur khud bhi qasid ke piche piche chalne lage, aur Laila ke qareeb pahunch gye...
Kehte hain ki is duniya me jeete jee bhi mahboob ke talab me nakaami hui, kahin aisaa na ho ki agle duniyaa me bhi nakaami mil jaaye...
urūj-e-ādam-e-ḳhākī se anjum sahme jaate haiñ
ki ye TuuTā huā taarā mah-e-kāmil na ban jaaye...
Tashreeh-
Urooj-e-Aadam-e-khaki yani maadi insaan ka urooj yani taraqqi, isse Anjum sahme jaate hain, najm ki jama hai Anjum yani sitaare wo dare hue hain wo sahme jate hain, kyon?
Qki Tutta huwa Tara (insaan) Mah-e-kamil (Mukammal chand) na ban jaaye..
Muraad ye hai ki insaan ko Tutta huwa Tara isliye kaha gaya, qki ye apni asli manzil se bichda huwa hai, jo ki jannat hai, insaan jannat se aaya hai aur uska safar duniya ka jannat ke hi traf hai, wo apni manzil se bichda hua hai abhi,
to ye jab apne jannat ke safar sa aaghaz karta hai, uski traf badhne ke liye apne rooh ko taiyyaar krta hai to wo bulandiyon aur taraqqiyon ki taraf badhta hai, apni ruhaani taraqqi ki taraf badhta hai to uski taraqqi dekhkr sitaare bhi sahme jaate hain,
Muraad ye ke fir wo insaan sitaaron se bhi buland muqaam rkhta hai,
Isi mafhoom ko Allamah Iqbaal ne ek dusri jagah Adaa kiya-
*Pare hai charkhe neeli faam se manzil musalmaan ki,
Sitaare jiski gard-e-Raah hon wo manzil tu tu hai...*
Comments